Абрад «Зажынкі» даў старт уборачнай кампаніі на Чачэршчыне

У даўнія часы нашы продкі, перш чым прыступіць да жніва, звярталіся да нябёс з маленнямі аб спрыяльным надвор'і і багатым ураджаі. З верай у сілу зямлі яны з малітвай зажыналі першы сноп і ўслаўлялі працу хлебаробаў. І сёння на Чачэршчыне беражліва захоўваюць гэтыя традыцыі, разумеючы, што перад напружанай працай кожнаму неабходны хвіліны свята і душэўнага ўздыму. 

Менавіта гэты старажытны земляробчы абрад даў старт жніву на Чачэрскай зямлі. 

Лічыцца, што зажынкі дораць ніве ўрадлівасць, а каласам – сілу хутчэй налівацца і спець. І няхай сёння ўборка ўраджаю поўнасцю механізавана, каб захаваць сувязь з традыцыямі продкаў, першыя каласы сярпом зрэзалі жанчыны. Звязаны з каласоў сноп, як сімвал надзеі на багаты ўраджай, быў урачыста перададзены гаспадару Чачэрскай зямлі – кіраўніку раёна Сяргею Гайкову. 

Па добрай традыцыі благачынны Чачэрскай акругі, настаяцель прыхода храма Праабражэння Гасподняга айцец Генадзь благаславіў пачатак работ і асвяціў збожжаўборачную тэхніку. 

Абрад «Зажынкі»– гэта не проста даніна традыцыям, гэта сімвал павагі да зямлі, працы хлебаробаў і надзея на шчодры ўраджай.